ماہنامہ عبقری - مئی 2010ء

قوت برداشت ان اعلیٰ صفات میں سے ہے جو افراد کیلئے انفرادی طور پر اور اقوام کیلئے اجتماعی طور پرکامیابی اور فلاح، عزت و عظمت اور ترقی و بلندی کا ذریعہ بنتی ہیں۔ حلم وہ دولت ہے کہ جس کی وجہ سے انسان کے نفس میں وہ قوت برداشت پیدا ہوتی ہے جو کسی بھی حالت میں انسان پر قوت غضب کو غالب نہیں آنے دیتی ایک حلیم انسان کی مرضی و منشاءکے خلاف کوئی بات ہویا اس کو کتنی ہی تکلیف پہنچائی جائے وہ شور شرابے سے گریز کرتا ہے اورصبرو ضبط سے کام لے کر تکالیف کو برداشت کرتا ہے اور جو لوگ برداشت اور صبر کو سامنے رکھتے ہیں وہ زندگی میں چوٹیں کم ہی کھاتے ہیں کیونکہ حوصلہ اور صبر ان کا زیور ہوتا ہے وہ سبھی حالتوں میں متحمل مزاج ثابت ہوتے ہیں، بیکار چڑچڑانے میں وہ اپنا وقت خراب نہیں کرتے وہ زندگی کی ہر پریشانی ہنس کر جھیل لیتے ہیں وہ جانتے ہیں کہ جب کسی بات کو روکا نہیں جاسکتا تب بیکار کی کوشش اور فکر کرنے سے فائدہ ہی کیا؟ اسے سہہ لینا ہی اچھا ہے یاد رکھیے ایسے لوگ فراخ دل ہوتے ہیں اور دوسروں سے ناممکن اور مشکل کاموں کی امید نہیں رکھتے۔ اپنے اندر معاف کرنے کا جذبہ پیدا کیجیے جتنا زیادہ آپ میں معاف کرنے کا جذبہ ہوگا اتنا ہی آپ کی شخصیت میںنکھار آئے گا جب آپ کسی کی غلطی کو کسی کی حماقت یا بددیانتی کو معاف کرتے ہیں تو آپ خود کو بہت سے منفی جذبوں سے بچاتے ہیں اور بہتر انسانی معاشرے کی تشکیل میں شریک بھی ہوتے ہیں۔نفسیات اور انسانی کردار کے بعض ماہرین معاف کرنے کے ایک اور مفید نتیجے کی طرف توجہ دلانے لگے ہیں جو ماضی میں ہم سے اوجھل رہا ہے۔ چنانچہ وہ ہمیں بتاتے ہیں کہ معاف کرنے سے جذباتی اور نفسیاتی صحت کے ساتھ ساتھ فرد کی جسمانی صحت کو بھی فائدہ پہنچتا ہے۔ اس فعل میں ایسی توانائی پوشیدہ ہے جس کو پوری طرح استعمال کرنے کا ڈھنگ ابھی تک نہیں سیکھا گیا۔ یہ صحت افزا توانائی ہے۔ قوت برداشت والا شخص تمام حدود کو پار کرکے کسی بھی بلندی پر پہنچ سکتا ہے لیکن اس کیساتھ آپ کو بے انصافی اور ظلم برداشت نہیں کرنا چاہیے بلکہ اس کےخلاف اپنی آواز ضرور بلند کرنی چاہیے لیکن احترام اور مہذب طریقے سے۔ پچھلا صفحہ